Muxuu yahay ujeedka laga leeyahay wareejinta dugsiga sare ee 15 May ee ay gacanta ku heysay Masar???

Wasaaradda Waxbarashada ee Dawladda Federaalka ee Soomaaliya ayaa sheegtay inay dib ula wareegi doonto dugsiga sare ee 15 May oo ay gacanta ku hayaan ergada waxbarashada Masaarida ee Soomaaliya.
Ergada Masaarida ayaa dugsigaasi waxa ay gacanta ku hayeen tan iyo sanadkii 2015-kii markaas oo maamulkiisa lagu wareejiyay.
Wasaaradda Waxbarashada ee Soomaaliya ayaa sheegtay in loo baahday iskuulka si loogu badallo dugsiga tababbarka macalalimiinta gabdhaha, kaas oo soo saari doona hablaha macalimiinta ka noqon doona dugsiyada hoose iyo dhexe ee waddanka.
Wasiirka Waxbarashada Cabdillahi Goodax Barre oo wareysi siiyay BBC-da ayaa waxba kama jiraan ku tilmaamay war ay barahooda bulshada ku qoreen xildhibaano ka tirsan Golaha Shacabka ee Federaalka ee Soomaaliya, kuwaas oo sheegayay in sababta dawladdu ula wareegtay dugisga 15 May ay ka dambeysay amar uga yimid dawladda Itoobiya.
Wasiir Goodax ayaa mar uu umuurtaasi ka jawaabayay waxa uu yiri: “Waan arkaayay [baraha bulshada] iyo [baraha internet-ka] arrimaha Soomaalida ka hadlo xildhibaanno ka hadlaayo, aniga xildhibaannadaas, xildhibaanno siyaasadda ka dhacay oo dowladnimada iyo wadaniyadooda ay aad u hoosayso ayaan aaminsanahay inay yihiin”. ayuu yiri Goodax Barre.
“In go’aan iskuul ku yaal Xamar oo aan dadkeenna ugu danaynayno oo aan howlaheenna ku qabsanayno ay yiraahdaan dowladda amar ayaa meel laga soo siiyay waa u wadaninimo xumo waana u dadnimo xumo. Waxay rabaan oo kale ha sameeyaan laakiin inay tacliinta siyaasadeeyaan waa u dadnimo xumo.”
Haddaba xildhibaannadaas waxaa ka mid ah xildhibaan Mahad Salaad oo ka tirsan Golaha Shacabka ee Federaalka ee Soomaaliya kaas oo bartiisa Facebook-ga soo dhigay farriin uu ku dhaleecaynayo amarka dowladda ee dugsiga sare ee 15-ka May looga wareejinayo dowladda Masar.
“Amar lagu raali gelinayo Itoobiya oo lagu xiray Iskuulkii 15 May ee dowlada Masar maamuleysay, ardayda dhigatana lacag la’aan wax lagu bari jiray!” ayuu yiri xildhibaan Mahad Salaad.
“Horay hadii Qalbi Dhagax loogu dhiibay. Dekadihii dalka lagu wareejiyay. Qaraarkii Jaamacada Carabta ee dowlada Soomaaliya horay u taageertay amarkooda looga laabtay. Diyaradoodii dalka meeshii ay rabto maalin walba ka degayso kuwii kaloo xayiran. Maantana Iskuuladii amarkooda lagu xirayo, tolow maxaa haray?!”
Ka gudub Facebook daabacaad W.Q Mahad Salad
Amar lagu raali gelinayo Itoobiya oo lagu xiray Iskuulkii 15 May ee dowlada Masar maamuleysay, ardayda dhigatana lacag…
Posted by Mahad Salad on
Friday, 27 March 2020
Dhammaadka Facebook daabacaadda qore Mahad Salad
Wasaaradda waxbarashada ee Soomaaliya ayaa waxa ay horraantii bishan soo saartay codsi ay ku dalbanaysay in maamulka dugsigaas lagu soo wareejiyo wixii loo gaaro 30-ka bisha Abriil ee soo aaddan.
La wadaag qodobkan

Wasiirada Caafimaadka Dowlada Federaalka ah ayaa sheegtay in Muqdisho lagu arkay Cudurka Coronaverus COVID-19

Wasiirada Caafimaadka Dowlada Federaalka ah ayaa sheegtay in Muqdisho lagu karantiilay muwaadin soomaaliyeed oo laga helay Cudurka Coronaverus COVID-19🇸🇴 BBC Somali News 🇸🇴 @bbcsomalinews 🇸🇴

Waa Kuma Cabdirashiid Janan?

Ku xigeenka taliyaha booliska Soomaaliya, Sareeye-guuto Zakiya Xuseen, ayaa shalay shaacisay in uu xabsiga ka baxsaday wasiirka amniga Jubbaland, Cabdirashiida Janan. Waxay sidoo kale sheegtay in laamaha amniga ay ku raad joogaan Janan.
Dhanka maamulka Jubbaland ayaa shaki ka muujiyay arrintaan. Warsaxaafadeed ka soo baxay maamulkas aya lagu yiri “Waxaan madaxda xukuumadda federaalka si degdeg ah uga dalbaneynaan in ay meel ku sheegaan wasiirka”.
Dowladda Federaalka ee Soomaaliya ayaa bishii Augst ee 2019-kii, shaacisay inay xabsiga dhigtay Cabdirashiid Xasan Cabdinuur (Janan), wasiirka amninga ee Jubaland. Dowladdu waxay sheegtay in Cabdirashiid Janan loo haysto “dambiyo culus” oo uu galay. Tan iyo xlligaas, hal mar ayaa maxkamad la horgeeyay.
Soo shaacbixii Janan
Bartamihii sagaashameeyadii ayuu isagoo da’yar waxa uu ku biiray ururkii Al-Itixaad ee gobolka Gedo kaas oo waqtigaas la dagaallamayay ciidammada Itoobiya ee gacanta siinayay kuwii ururkii SNF ee la wareegay degmooyiinka Baledxaawo, Doolow iyo Luuq ee gobolkaasi.
Muddo ka dib, markii laga adkaaday ururka Al-Itixaad, Cabdirashiid Xasan Cabdinuur (Janan) wuxuu dhexdhexaadin ka dib, uu dib ugu laabtay magaalada Doolow ee Soomaaliya halkaas oo uu ka talin jiray maamul gacan saar la lahaa dowladda Itoobiya.
Waa halka uu ka helay fursaddiisa maamul. Waxaa muddo yar ka dib loo magacaabay gudoomiyaha degmada Doolow, taasna waxay u sahashay inuu udub dhexaad u noqdo siyaasadda gobolka Gedo oo intiisa badan ay gacanta ku hayeen ciidammada Itoobiya.
Mudadii uu maamulayay magaalada wuxuu wax badan ka qabtay ammaanka iyo in xarun uu degmada uga dhigay hay’adaha samafalka ee ka shaqeeya Koonfurta Soomaaliya taas oo fursado shaqo u abuurtay dhalinyarada deegaankaasi.
Dagaallada uu ka qeybgalay
Cabdirashiid Janan waxaa la sheegaa inuu dagaallo kala duwan ka qeybgalay.
Sagaashameeyadii wuxuu ka mid ahaa dhalinyaradii u dagaalami jirtay ururka Al-Itixaad ee ka soo horjeeday ciidammadii Itoobiya ee Gedo soo galay, kaas oo uu ka soo helay khibraddiisa dagaal walow aanan la ogayn tirada dagaallada uu waqtigaas galay.
Markii uu noqday gudoomiyaha degmada Doolow, waxa uu bilaabay inuu abaabulo ciidamo isaga ka amar qaata oo daacad u ah kuwaas oo ay u tababareen una qalabeeyeen ciidammada Itoobiya.
Dagaalladii ugu cuslaana wuxuu la galay ururka Al-Shabaab oo muddadaas haystay inta badan degmooyinka gobolka Gedo.
Hasayeeshee Cabdirashiid Janan wuxuu ku dhaawacmay mid ka mid ah dagaalladii uu la galay ururka Al-Shabaab. Waxaa la sheegaa in dagaalkaasi uu Shabaab iyo ciidammadiisa ku dhexmaray inta u dhaxaysa magaalooyinka Luuq iyo Garbahaarey.
Tacaddiyada lagu eedeeyay
Cabdirashiid Janan dadka dhaleeceeya waxa ay ku eedeeyaan inuu gacan bir ah ku qabto dadka maamulkiisa ka soo horjeesta amaba su’aal galiya sida uu wax u maamulo.
Waxaa lagu eedeeyay inuu gaystay tacaddiyo ka dhan ah aadaha; waxaa ka mid “in uu dilay dad maxaabiis ahaa oo u xirnaa maamulkiisa”, sida ay sheegeen hay’adaha u dooda xuquuqda aadanaha.
Hay’ad u doodda xuquuqda aadanaha ayaa sheegtay in wasiirka amniga Jubbaland ay tahay “in uu gurto miraha cadaaladda ee ay helaan dadkii uu dhibaatada u geystay”.
Hay’adda Amnesty International oo u dooda xuquuqda aadanaha ayaa sheegtay in Cabdirashiid Janan “looga shakisan yahay in uu masuul ka ahaa dembiyo ka dhan ah shuruucda caalamiga ah iyo xadgudubyo halis ah oo ka dhan ah xuquuqda aadanaha”.
“Waxaa ka mid ah carqaladeynta kaalmada bini-aadamnimo,” ayuu yiri Agaasime ku xigeenka hay’adda Amnesty International ee Bariga Afrika, Seif Magango.
“Xarigga Cabdirashid Janan waa tallaabo muhiim u ah isla xisaabtanka la xiriira xadgudubyada xuquuqda aadanaha ee muddada sanadaha ah la geysanayay iyadoo ciqaab aysan marin kuwii ka dambeeyay ee ah dadka awoodda leh ee Soomaaliya”, ayuu yiri Seif Magango.
“Baaritaanka iyo maxkamadeynta Cabdirashiid Janan waa in ay horseedaan xilli ay cadaalad helaan dadka dhibanayaasha ah ee xuquuqdooda aadanaha lagu tuntay iyo qoysaskooda ku sugan Soomaaliya”, ayuu hadalka ku sii daray.
Waxaa sidoo kale lagu eedeeyay inuu xiray uuna musaafuriyay qaar ka mid ah dad ku noolaa magaalooyiinka uu ka taliyay ee maamulkiisa uu gaaray.
Eedahaas waxaa ka mid ah dagaal bartimihii sannadkii 2016 ka dhacay magaalada Baledxaawo halkaas oo lagu dilay laba qof iyo lix kalana lagu dhaawacay ka dib markii “ciidammada Jubaland ay weerrareen maleeshiyo ay sheegeen inay isku uruursanayeen magaalada”.
Hay’adda dabagalka ee Qaramada Midoobey u qaabilsan Soomaaliya iyo Eritrea ayaa warbixinnadoodii 2016 iyo 2017 ku eedeeyay Cabdirashiid Janan “Xadgudubyo halis ku ah xuquuqda aadanaha”.
Sidoo kale waxay la xiriiriyeen “Abaabullidda carqaladeyn ka dhan ahayd kaalmada bini-aadamnimo” muddadii u dhexeysay 2014 iyo 2017.
Waxaa ka sii horraysay eed aheyd inuu si bareer ah u toogtay oo maydkoodana uu bannaanka ku tuur afar qof oo haweeney ay ka mid aheyd oo ku jiray xabsiga degmada Doolow, sida lagu sheegay warbixin ay soo saartay kooxda dabagalka ee Qaramada Midoobay ee Soomaaliya iyo Eretria.
Dhammaan eedahaasi Cabdirashiid Janan gaashaanka ayuu u daruuray wuxuuna sheegay inay warar aan jirin buunbuubinayaan dadka diiddan sida wanaagsan ee uu wax u maamulo, inta badanna dadka deegaannada uu ka taliyana ay isaga taageersan yihiin.
Shilkii gaari
Cabdirashiid Janan, bilowgii sannadkii 2015-kii, wuxuu dalka Itoobiya ku galay shil gaari. Dhaawac culus ayaa shilkaasi ka soo gaaray waxaana markii hore lagu dabiibay isbitaal ku yaalla dalka Itoobiya markii dambana dibadda ayaa loo sii qaaday.
Shilkaas wuxuu saameeyay caafimaadkiisa. Cabdirashiid Xasan Cabdinuur waxaa wajigiisa ka muuqda raadka qalliinnadii lagu sameeyay intii lala tacaalayay.
Muddo ayuu ka maqnaa xafiiska awoodda badan ee uu ka hayay maamulka Jubbaland ee ah wasiirka amniga.
Shaacinta dilkii Dulyadayn
Bartamihii bishii June ee sannadkii 2016, wasiirka amniga Jubaland Cabdirashiid Janan oo magaalada Kismaayo kula hadlay wariyayaasha, ayaa xaqiijiyay in ragga la dilay uu ku jiro Maxamed Maxamuud Cali (Dulyadeyn), iyo ciidan tiradoodu uu ku sheegay 16 oo 4 ay saraakiil Al-Shabaab yihiin.
Saraakiisha kale ayuu magacyadoodu ku sheegay Farxaan iyo Macalin Isxaaq oo “qaraxyada Kismaayo u qaabilsanaa” ururka.
Maxamed Maxamuud Cali (Dulyadeyn) ayey dowladda Soomaliya u haysatay weeraro badan oo dad ku dhinteen, halka dowladda Kenya ay ku eedeysay weerarkii jaamacadda Gaarisa oo ay ku dhinteen ku dhowaad 150 qof.
Dalabka Jubbaland ee siideynta Janan
Maamulka Jubbaland ayaa sharci darro ku tilmaamay go’aankii ay dowladda Federaalka Soomaaliya xabsiga ugu taxaabtay wasiirka amniga Jubbaland Cabdirashiid Janan, waxa ayna si degdeg ah u codsatay in la sii daayo.
Jubbaland ayaa sheegtay in ay aad uga walaacsan tahay “nolosha, amniga iyo badqabka” wasiirka Muqdisho lagu xiray.
Wasiirka warfaafinta ee Jubbaland Injineer Cabdi Xuseen Sheekh Maxamed ayaa BBC-da sharraxaad ka siiyay war-saxaafadeedka ay arrintaas kasoo saareen, wuxuuna sheegay in wasiirka la xiray isagoo xasaanad leh, meel uu illaa iyo hadda ku sugan yahayna aan laga warqabin.
“Waxaan dooneynaa inaan ogaanno xaaladda uu ku sugan yahay wasiirka, meesha lagu hayo iyo sababta loo qabtay intaba”, ayuu yiri Injireen Cabdi.
Wuxuu intaa ku daray in dalabka uu ku aaddan yahay cid walba oo ku lug leh xarigga Cabdirashiid Janan, wuxuuna yiri: “Waa inaan fahanno sharciyadda loo maray xiritaankiisa, war saxaafadeedkeennana wuxuu ku socdaa ciddii ka dambeysay qabashadiisa; dowladda Federaalka iyo garsoorka. Waan damacnay in aan la hadalno dowladda laakiin way diideen inay ka hadlaan arrintaas, wasiirkana meel lagala xiriiri karo ma jirto”.
Go’aankii Maxkamadda Gobolka Banaadir ay ku cafisay Janan
Bishii Juun ee sannadkan ayay aheyd markii ay soo shaacbaxday warqad ay soo saartay Maxkamadda Gobolka Banaadir oo ay ku burinaysay dacwad Cabdirashiid Janan ka taallay maxkamadda kaas oo uu soo gudbiyay Xafiiska Xeer ilaalinta Qaranka ee Soomaaliya.
Qoraal ka soo baxay Maxkamadda oo ku astaysnaa 30 kii bishii Abriil ee isla sannadkan ayaa lagu sheegay in maxkamadda ay burisay amar soo qabasho ah iyo horkeenid maxkamadeed oo horay maxkamaddaasi uga soo baxay.
Cabdirashiid Xasan Cabdinuur (Janan), waa mid ka mid ah wasiirrada ugu awoodda badan maamul goboleedka Jubbaland ee Soomaaliya.
Wuxuu dowr muhiim ah ka soo dheelay abaabulkii iyo aasaaskii dowlad goboleedkaas, taas oo keentay inuu wasiirka amniga ee aan dhicin ka noqdo maamulkaas mudada uu jiray.
Shaac baxa khilaafka dowladda dhexe iyo Jubaland
Bishii Oktoobar ee sannadkii 2018-kii, wasiirka amniga dowlad goboleedka Jubbaland Cabdirishiid Jana oo la hadlayay saraakiisha ciidamada ee maamulkaas wuxuu dowladda federaalka ah ku eedeeyay in ay faragalin ku hayso maamulkooda, wuxuuna ka digay in ay tallaabo adag ka qaadi doonaan ciddii kusoo xad gudubta.
“Meesha la yiraahdo Baydhabo doorashaa ka socota, waxa ka jirana waad ogtihiin, baabuur dad laga soo hormariyo, 20 wasiir oo la’isku soo daro. Anagana doorasho ayaan u soconaa, qof kii raba in uu doorasho galo waxaan ogolnahay isaga oo nabad ah, oo shaqsi ah in uu garoonkaas kasoo dego, ma dhibaateyneyno, xaq buu leeyahay”, ayuu yiri Janan.
Wuxuu intaa ku daray: “Laakiin waxa dadka qaarkiis lagula dhaqanayo ciddii nagula dhaqanta awood baan u leenahay in aan garoonka ka celino”.
“Qofka doonaya in nidaamka aan ku shaqayno mid aan ahayn uu meeshan ka sameeyo, waa in marka hore uu inaga na xaaqo; haba na buufiyo haddii uu rabee. Qaab awoodeed haddii aan dareeno, waxaan waddano bakoorado ma ahan,” ayuu yiri Cabdirishiid oo u muuqday in uu muujinayay in Jubbaland ay hubeysantahay.

Caddeyn “Xad-dhaaf” ah oo loo helay mooshinka xil ka qaadista Trump

Lahaanshaha sawirka REUTERS

Caddeynta loo helay xil ka qaadista Donald Trump ee ah in uu awoodda xafiiska si xun u adeegsaday, waa mid “xad-dhaaf ah”, sida lagu sheegay warbixin ay soo saareen guddiga baaritanka ku sameynaya madaxweynaha Mareykanka.
Madaxweynaha wuxuu adeegsaday siyaasad ku saleysan dano shakhsiyadeed “oo aan ahayn danaha qaranka Mareykanka”, ayaa lagu xusay warbixin muhiim ah oo loo diray Aqalka Wakiillada Mareykanka.
Wuxuu sidaas sameeyay isagoo “faragelin dibadeed ka dalbaday” Ukraine, si ay uga caawiso in dib loo doorto 2020-ka, ayaa ku xusan qoraalka.
Ujeedada warbixinta waxay tahay in xafiiska laga saaro madaxweyne Donald Trump.
Wuxuu Trump beeniyay in uu qalad sameeyay, wuxuuna baaritaanka ku tilmaamay ugaarsi xun oo isaga ka dhan ah.
Ka hor inta aanan la shaacin warbixinta qabyada ah, Madaxweynaha oo ka tirsan Xisbiga Jamhuuriga wuxuu weeraray Dimuquraadiyiinta hor-kacaya baaritaanka oo uu ku tilmaamay “kuwo aan wadaniyiin ahayn”.
Ka dib markii la daabacay qoraalka caddeynta ah, Afhayeenka Aqalka Cad, Stephanie Grisham, wuxuu yiri Dimuquraadiyiinta “waxay gebi ahaanba ku fashilmeen soo bandhigidda cadeyn muujineysa in qalad la sameeyay” iyo in warbixinta “ay muujineyso jahwareerka iyaga haysta oo keli ah”.
Warbixinta waxaa hadda loo gudbinayaa Guddiga cadaaladda ee Aqalka Wakiillada kuwaas oo Arbacada billaabi doona hannaanka, waxayna eegayaan in mooshin dhab ah oo xil ka qaadis ah oo ka dhan ah Trump ay soo bandhigaan.
Maxaa ku qoran warbixinta?
Warbixinta ka dhalatay baaritaan lagu sameeyay xiriirka Trump iyo Ukraine waxaa dadweynaha loo soo bandhigay Talaadadii, kaas oo ay diyaariyeen Guddi uu Congress-ka soo xulay.
Waxaa lagu sheegay “in la caddeeyay in iskudeyga bilaha qaatay ee uu sameeyay madaxweynah Trump isagoo adeegsanayay awoodda xafiiskiisa oo uu ku dalbaday faragelin dibadda ah oo la xiriiray doorashada 2020-ka”.
“Barnaamijka madaxweyne Trump wuxuu ahaa mid aan waafaqsanayn shuruucda arrimaha dibadda ee ku wajahan Ukraine, wuxuuna liiday Amnigeena qaran isagoo dalbaday in eex loo sameeyo oo la billaabo baaritaan ku saleysan dano siyaasadeed oo ka caawiya in dib loo doorto doorashada soo socota,” ayaa lagu sheegay warbixinta.
“Trump wuxuu dalbaday in madaxweynaha cusub ee loo doortay Ukraine, Volodymyr Zelensky, uu si shaac ah u sheego baaritaan lagu sameynayo siyaasiga ay Trump ishayaan, madaxweyne ku xigeenkii hore, Joe Biden, iyo in meesha laga saaro in Ruushka uu farageliyay doorashadii 2016-kii, balse ay Ukraine ahayd.”
Caddeynta dhaqan xumada waa mid xad-dhaaf ah “iyo sidoo kale in caddeynta ah in uu isku deyay in uu is hortaago Congress-ka.”
Faafaahinta cusub ee la helay
Waxaa suuragal ah in la yab ay ku noqoto qof kasta oo dhageystay haddalladii ugu dambeeyay ee dheeraa, kuwaas oo aan u diyaarsanayn Adam Schiff, ee uu jeediyay xilligii dhageysiga uruurinta cadeymaha mooshink ka dhanka ah Trump, laba isbuuc ka hor, in hadda qoraalka kooban oo horudhaca ah uu guuddiga uu soo saaro, Talaadadii. In kastoo lagu dhex milay caddeynta, warbixin 300 oo

bog ka kooban, haddana waxaa ka buuxa faafaahinno cusub.
Shirkadda isgaarsiinta ee AT&T, taas oo baarayaasha Rudy Giuliani, ayaa siisay macluumaadka telefoonnada la duubay, waxay muujiyeen arrimo cusub oo la xiriira wakhtiga iyo baaxadda wadahadalkii qareenka gaarka ah ee Trump uu la yeeshay Aqalka Cad.

Been uu sheegay “Trump” oo baaritaan lagu haayo

Talaabada xigta ee mooshinka xil kaqaadista Trump oo la shaaciyay

Sidee Xilka Looga qaadi karaa Madaxweyne “Trump”?

Tani iyo bishii April ee sannadkan, Giuliani wuxuu la xiriiray tiro telefoonno ah oo Aqalka Cad ah, gaar ahaan, xafiiska mamulka iyo miisaaniyadda – laanta dowladda ee lehayd go’ankii ugu dambeeya ee hakinta gargaarka militari ee Ukraine uu u ansixiyay Congress-ka.
Inkastoo aan la ogeyn faafahinta wixii lagu wadahadlay, haddana jiritaankaas wuxuu muujinayaa isfaham la’anta ka dhex jirta qaar ka mid ah kuwa dowladda difaacaya ee uu Giuliani uu si gaar ah oo madaxbannaan ula shaqeynayay masuuliyiintaas sare.
Dhowr qof oo goobjoogayaal ahaa, sida safiirka Mareykanka ee EU Gordan Sondland, waxay ku marqaati fureen in Giuliani uu hagayay masuuliyiintaas, xilligii amarka madaxweynaha ee cadaadinta Ukraine taas oo siyaasad ahaan faa’iido u ahaan lahayd Mr Trump.
Hadda qadkii xiriirka Giuliani iyo Aqalka Cad wuxuu noqday mid cad oo muuqda.

Xukun Trump Ka nixiyay oo ay maxkamadi gaartay

Lahaanshaha sawirka REUTERS
Garsoore ayaa madaxweynaha Mareykanka Donald Trump ku amaray inuu waaxda dambi baarista ee New York uu u soo gudbiyo canshuur celintiisii ee 8-ddii sannadood ee ugu dambeysay.
Garsooraha ayaa diiday doodaha qareenada madaxweynaha ee ah in xasaanada guud ay ilaaliso isaga inta uu xafiiska joogo.
Mr Trump waa madaxweynaha kaliya ee Mareykanka soo maray ee aanan shaacin cashuur celintiisa tan iyo sannadkii 1960-kii.
Xukunkaan maxkamadda ayaa waxa uu sahlayaa baaritaanka ku saabsan lacagtii la sheegay in la siiyay labadii dumar ee sheegay inay xiriir la lahaayeen Mr Trump.
75-ka bog ee xukunka lagu qoray ayuu garsoore Victor Marrero ku sheegay in uusan aqbali karin “sheegasho aan xad lahayn oo ku aaddan xasaanadda madaxweynaha ee nidaamka garsoorka”.
Qareenada madaxweynaha ayaa islamarkiiba dacwad racfaan ah u gudbiyay maxakamadda sare.
Dhanka kale madaweynaha ayaa xukunka ka dib bartiisa Tweeter-ka soo dhigay in arrintani ay dabada ka riixayaan dacwad oogeyaasha Dimuqraadiga si madaxweyne Trump dambi loogu helo.
Maxay arrintani salka ku haysaa?
Baarintaanka ayaa waxa uu quseeyaa lacag uu qareenkii hore ee madxweyne Trump siiyey laba haween oo sheegay inay xiriir la lahaayeen Mr Trump.
lacagta la sheegay in dumarkaasi la siiyay ayaanan loo soo gudbin guddiga doorashada ee federaalka.
Balse su’aasha isweydiinta mudan ayaa ah lacagtaasi la bixiyay ma waxaa loogu talagalay in lagu dhowro sumacadda gaarka ah ee Mr Trump ama waxaa lagu difaacayay sharafta musharax madaxweyne.

Qaraxyo Lala Beegsaday ciidamada Amisom

Qaraxyo lala beegsaday ciidamada AMISOM

Wararka ka imanaya gobolka Shabeellada Dhexe ayaa sheegaya in laba qarax lala beegsaday ciidamada Burundi ee ka tirsan hawlgalka AMISOM.
Qaraxyadan ayaa la sheegay inuu duhurnimadii maanta ka dhacay deegaanka Buurane oo ka tirsan gobolka Shabeellada Dhexe sida B.B.C da ay u sheegeen dad degaanka ku sugan.
Qaraxyada ayaa lala eegtay askarta AMISOM kuwaas oo ku sugnaa meel u dhow saldhig ay ku leeyihiin deegaanka Buurane .
Sida wararku ay sheegayaan qaraxa koowaad ayaa geystey qasaare kooban halka markii ciidamo kale oo u soo gurmaday askartii wax ku noqotay qaraxa koowaad ay la kulmeen qarax labaad.
Dadka degaanka ayaa sheegay in ugu yaraan saddex askari ay waxyeello kasoo gaadhay qaraxa labaad, hase yeeshee Af-hayeeenka AMISOM oo ay la xiriirtay B.B.C waxa uu sheegay inay kaga dhaawacmeen laba askari.
Dhinaca kalena, dadka degaanka ayaa sheegay in rasaas ay fureen ciidamada AMISOM uu ku dhintay qof rayid ah.